Emra të njohur të muzikës shqiptare ( kryesisht kompozitorë të para viteve ’90), thonë shpesh nëpër intervista se muzika shqiptare është shumë e dobët dhe se kantautorët e rinj, janë duke ç’kulturuar dëgjuesin shqiptar. Por çfarë dëgjojnë më shumë shqiptarët?! Cilët janë preferencat e tyre muzikore?! Kjo është një përgjigje shumë e vështirë për tu dhënë, sepse shijet dhe preferencat janë nga më të ndryshmet.
Aurela Gaçe një nga këngëtaret e njohura të muzikës shqiptare, e cila ka arritur të mbijetojë edhe në ditët e sotme në industrinë muzikore, thotë në një intervistë se shqiptarët dëgjojnë çfarëdo lloj muzike. Jo më kot në klubin e saj, Gaçe këndon një shumëllojshmëri rrymash e këngësh, madje edhe ato labçe. “Këtu pëlqejnë edhe rock edhe tallava se ballkanas jemi në fund të fundit dhe na pëlqen ritmi. Mos të harrojmë se këtu ka shumë klube, ku janë të ftuar edhe shumë Dj të njohur, por nga ana tjetër edhe artistë të hip hop-it. Mua nuk më shqetëson asnjë rrymë muzikore, përderisa secili është i lirë të dëgjojë e të shijojë ç’të dojë”, thotë Gaçe.
Në të njëjtën linjë ështe edhe Dj Sardi. Në një prononcim për “Opinion. al” Sardi thotë se, muzika në klubet ku ai luan është e shumëllojshme. “ Vitet e fundit në klubet e natës, luhet edhe muzikë komerciale shqiptare, njerëzit e duan dhe kërcejnë pa fund me të. Nuk mund të them fiks se çfarë pëlqejnë shqiptarët, ajo që mund të them me siguri është se ne jemi një popull kaotik. Ata që sot kërcejnë me këngën “Shum Pis”, nuk është çudi që të nesërmen të dëgjojnë këngën e fundit të “Adele”.
Në një treg të tillë muzikor, ku çdo ditë shfaqen këngëtarë të rinj e ku kantautorët përpiqen të sjellin çdo ditë rryma e tendenca të reja muzikore (inspiruar edhe nga trendet ndërkombëtare), zgjedhja mbetet në dorë të publikut.
