Greqia po përballet prej disa ditësh me një situatë tepër të vështirë, si pasojë e reshjeve të një sasie të lartë dhe përmbytjeve.
Mediat greke shkruajnë se situata në fushën e Kardicës është dramatike. Pothuajse të gjitha fshatrat janë nën ujë nga reshjet e dendura të shiut.
Ndërsa në komunën e Palamasit njerëzit kanë hipur mbi çati ose në vende më të larta për të shpëtuar.
Po ashtu situata në zonën e Metamorfosit është zemërthyese, shkruan Protothema.
Në këtë zonë është kërkuar ndërhyrja nga Forcat e Armatosura, EMAK , ndërsa kërkohen edhe helikopterë për shpëtimin e qytetarëve.
Pamja në qytetin e Kardicës është më e mirë, por sërish ka nisur të bjerë shi, duke shkaktuar shqetësim të madh te banorët.
“Jam i sigurt se do të kemi mbytje”, thotë kryebashkiaku Palamas. “Është një situatë tragjike. Ne jemi të pafuqishëm. Njerëzit janë bllokuar brenda shtëpisë, uji ka kaluar 1.5 metra. Do të kemi mbytje, kam bërë apele gjithandej. Më telefonojnë dhjetëra banorë dhe kërkojnë ndihmë. Sigurisht që jo të gjithë janë në gjendje të mirë shëndetësore”, tha për SKAI kryebashkiaku i Palamas, Giorgos Sakellariou.
“Palamas dhe Metamorfosi në Kardicë janë prekur veçanërisht nga përmbytjet, po mundohemi të afrohemi nga ana e Iteas. Shkojmë me mjete për të evakuuar personat që ndodhen në shtëpi pasi zona është përmbytur. Qasja është e vështirë, kemi reshje në një sasi shumë të lartë”, sipas përfaqësuesit të zjarrfikësve, Yiannis Artopioos.
Më herët në mëngjes është dërguar një mesazh 112 për banorët e Palamas Kardicës për t’u larguar nga zonat nëntokësore dhe përdhese të ndërtesave.
Në mesazhin 112 thuhet: “Nëse ndodheni në Palamas, largohuni nga zonat nëntokësore dhe përdhese të ndërtesave për shkak të zhvillimit të fenomeneve të përmbytjeve në zonë. Ndiqni udhëzimet e autoriteteve”.
