Një 41-vjeçar është arrestuar nga policia pasi kanosi me armë zjarri dhe qëlloi drejt nënës së tij. Ai ka qenë i dënuar më parë për armëmbajtje pa leje.
Policia informon se është shpallur në kërkim edhe shoku i tij pasi gjatë kontrollit në banesë iu gjet një armë zjarri pistoletë dhe lëndë narkotike.
Janë sekuestruar 2 armë zjarri pistoletë, fishekë luftarak dhe lëndë narkotike cannabis sativa.
Mësohet se pas marrjes së njoftimit se në fshatin Dushk, një shtetas ka kanosur për të vrarë nënën e tij si edhe ka gjuajtur me armë zjarri në oborrin e banesës, policia ka shkuar në menjëherë në vendngjarje.
41-vjeçari E.K, porsa ka parë policinë është larguar menjëherë, por pas ndjekjes është lokalizuar në një lokal në fshatin Dushk, Lushnjë, dhe falë ndërhyrjes u bë neutralizimi në kohë i tij dhe sekuestrimi i armës së zjarrit pistoletë me fishekë në fole gati për qitje dhe një krehër me fishekë luftarak.
Gjithashtu, në vijim të veprimeve hetimore të kryera nga Policia, u ushtrua kontroll në banesën e shtetasit A. Z., me të cilën autori shoqërohej. Gjatë kontrollit të banesës së shtetasit A. Z., u gjetën dhe u sekuestrua një armë zjarri pistoletë, 46 fishekë luftarak dhe një sasi me lëndë narkotike cannabis sativa e ndarë në 31 doza.
Në përfundim të veprimeve, policia ka bërë arrestimin në flagrancë të shtetasit E. K., 41 vjeç, për veprat penale “Mbajtja pa leje e armëve dhe municionit luftarak” dhe “Kanosja”, si edhe shpallën në kërkim dhe po punojnë për kapjen e shtetasit A. Z., 65 vjeç, banues në Dushk, Lushnjë, për veprat penale “Mbajtja pa leje e armëve dhe municionit luftarak” dhe “Prodhimi dhe shitja e narkotikëve”.
Materialet do i kalojnë Prokurorisë pranë Gjykatës së Shkallës së Parë Lushnjë, për veprime të mëtejshme./Opinion.al
