Që prej nisjes së karrierës në politikë, ZvKryeministrit, njëherazi Ministër i Jashtëm i Maqedonisë së veriut, Bujar Osmanit i janë besuar portofole të larta shtetërore, por edhe detyra të rëndësishme në institucione ndërkombëtare, mes të cilave edhe ajo e drejtuesit të OSBE-së.
Në 24 Prill do të garojë për një ndër postet më të larta, atë të Presidentit, nën siglën e Partisë Bashkimi Demokratik për Integrim, të fundit kështjellë që thotë se qytetarët e Republikës së Maqedonisë së Veriut mund t’ia besojnë një kandidati shqiptar.
Bujar Osmani: Ishte zonë e ndaluar që kryetari i Kuvendit të jetë shqiptar. Unë e quaj “kështjellë e monopolit etnik” pozita e kryeministrit. Ka mbetur dhe një kështjellë e fundit e monopolit etnik, e rezervuar për një komunitet dhe e ndaluar për një komunitet tjetër. Qëllimi jonë është të arrihet barazia. Një numër i madh i komunitetit maqedonas janë duke e kuptuar që qenka vlerë e shtuar integrimi i shqiptarëve në institucione.
“Jo Rusisë, po Evropës” është slogani që do shoqërojë fushatën e tij, teksa këto zgjedhje i cilëson historike duke premtuar se do jetë jo vetëm gardian i kushtetutës, por mbi të gjitha i orientimit euroatlantik të Maqedonisë së Veriut.
Bujar Osmani: Kjo është ajo që garanton kandidatura ime duke pasur pozicionin tim ndërkombëtar në të kaluarën, qëndrimi im përsa i përket NATO-s dhe BE-së. Kam qenë mbartës i procesit të integrimit të Maqedonisë së Veriut në 7 vitet e fundit.
Kandidimin në postin e Presidentit të Maqedonisë së Veriut e cilëson referendum popullor, teksa thotë se e kundërta vetëm sa do instalojë një proces përjashtues.
Bujar Osmani: Po qe se edhe këtë radhë, me këtë kandidaturë, qytetarët do të votojnë vetëm mbi baza etike, ne nuk mund të bëhemi pjesë në proceset zgjedhore përjashtuese.
Veten e sheh favorit përballë rivalit të tij në garë, kandidatit shqiptar të opozitës, Arben Taravari.
Bujar Osmani: Kundër-kandidati im kishte një krizë politike në partinë e vet dhe u shkarkua nga partia e tij dhe nuk e bën kjo me bagazh të mjaftueshëm për të retenduar një opozitë të unifikimit të popullit.
Madje favorit thotë se ndihet edhe përballë presidentit aktual, Stevo Pendarovski, i cili garon për një mandat të dytë presidencial.
Bujar Osmani: Duke qenë se kam qenë pjesë e dizenjimit të marrëveshjes së Prespës, ligjit të gjuhës, udhëheqës i procesit të marrëveshjes më Bullgarinë, kam mundësuar fillimin e bisedimeve me BE-në, më jep një avantazh të madh.
Mbështet idenë e zgjedhjes së presidentit nga kuvendi dhe jo nga populli, ndaj dhe shpreson se edhe pas 8 Majit, kur do të mbahen zgjedhjet parlamentare, ky amendim kushtetues do arrijë të gjejë mbështetjen e deputetëve të Kuvendit.
Bujar Osmani: Presidenti i ardhshëm të ketë përqimin e të gjithë komuniteteve për të luajtur rolin që ka dhe jo për t’u bërë burim i polarizimeve dhe i dallimeve shtesë në vend siç ka qenë në vazhdimësi.
Zgjedhjet për presidentin në Maqedoninë e Veriut do të mbahen në dy raunde, i pari në 24 Prill, ndërsa raundi i dytë do të mbahet së bashku me zgjedhjet parlamentare më 8 Maj.
