Një person tjetër i përmendur në përgjimet e publikuara nga gazeta ‘Bild’ ka reaguar për ngjarjen. Elton Arbana përmendet në përgjimin e katërt ku flet me Astrit Avdylajn dhe ky i kërkon të telefonojë urgjentisht inspektorët e INUK për të hequr gjobat e vëna në një nga bizneset e tij.
Kandidati për Bashkinë e Shijakut ka deklaruar në reagimin e tij se ka ndërgjegjen e pastër. Për të ndershmëria dhe integriteti janë absolutisht thelbësore megjithëse në përgjimet e publikuara ai vetë e pranon se e kanë shkarkuar nga puna në INUK sepse kishte bërë ndërhyrje në favor të disa subjekteve.
Sipas Arbanës përgjimet e dala dje janë thjeshtë baltosëse dhe biseda boshe, por këto përgjime në fakt janë pjesë e një dosjeje zyrtare të prokurorisë dhe aty shfaqet vet personi në fjalë duke biseduar.
Pjesa më e madhe e reagimit në Facebook flet për rrugëtimin e Elton Arbanës në jetën politike të Shijakut dhe se si kontributet e tij kanë arritur kulmin kur ai është përzgjedhur kandidat për Bashkinë. /Opinion.al
