Presidenti Ilir Meta këtë të dielë nga Korça në një dalje për mediat ka deklaruar se zgjedhjet e 25 prillit janë një test madhor për integrimin e vendit, test i cili sipas tij do të kalohet me hir apo me pahir.
Ai gjithashtu bëri thirrje gjithashtu për pastërtinë e kandidatëve në zgjedhjet e 25 prillit, ku theksoi që në kuvendin e ardhshëm të ketë sa më pak biznesmenë.
“Të fusim sa më shumë pedagoge dhe pedagogë, sa më shumë figura të pastra dhe ju lutem shumë sa më pak biznesmenë në Kuvendin e ardhshëm. Jo se kam ndonjë gjë me biznesmenët, por është e rëndësishme që të kemi njerëz me integritet që interesin publik e kanë të parin. E gjithë shoqëria të përfaqësohet ashtu siç e meriton në Kuvendin e ardhshëm të Shqipërisë. Është moment kyç për të ardhmen e Shqipërisë, pasi zgjedhjet e lira dhe të ndershme janë kryekusht për integrimin. Është një test madhor që jam i sigurt që do ta kalojmë me hir apo me pahir”, tha Meta./Opinion.al
