Disa kandidatë të Partisë Demokratike kanë kërkuar nga Komisioni Qendror i Zgjedhjeve pamjet filmike nga numërimi i votave. Duket se selia blu do t’i mbështesë ata në këtë proces për të bërë transparencë.
Këtë e zbuloi kreu i Partisë Republikane, Fatmir Mediu, i cili tregoi se kryetari i Partisë Demokratike, Sali Berisha u ka dërguar të gjithëve një mesazh që do të kenë mbështetjen e partisë për të bërë transparent procesin.
“Është e drejtë e çdo kandidati, e çdo subjekti politik që të verifikojë vërtetësinë e procesit të numërimit, ashtu siç duhet të identifikojmë problemet përpara numërimit, se manipulimi bëhet para se të fillojë procesi i numërimit. Zoti Berisha, sot ka shpërndarë një mesazh tek të gjithë kandidatët, që thotë se secili do të ketë mbështetjen e PD për të bërë transparent procesin. Një proces që nuk është transparent krijon gjithmonë thyerje dhe çarje brenda një subjekti politik. Do krijojë gjithmonë paragjykime”, tha Mediu.
Kryetari i PR-së, i cili në këto zgjedhje garoi në listën e mbyllur të Aleancës Shqipëria Madhështore, tha se ndryshe veproi Partia Socialiste.
“Është e turpshme urdhri që vjen nga Edi Rama që ju mbyllni gojën, mos krijoni pretendime për atë që doni të shikoni dhe kontrolloni, që është mundi dhe djersa e tyre në fund të fundit për atë që kanë bërë në fushatë elektorale, se kështu urdhëron komandanti suprem, që nuk duhet t’i shikojë njeri”, tha Mediu.
Në një intervistë për Besard Jacajn në Klan News, Mediu tha se në këtë fushatë është marrë me anën zgjedhore me Chris LaCivita dhe ekipin e tij. Por a mbeti i zhgënjyer bashkëdrejtuesi i fushatës së fitores së Donald Trump në Amerikë? Mediu tha se LaCivita ka kontributin e vet në fushatën elektorale. Ai u shpreh se marrëdhënia mes palëve është për një vit, e çdo gjë do të analizohet.
“Marrëdhënien me ta e kemi për një vit dhe do të shikojmë të gjitha ato që kanë të bëjnë me aspektin zgjedhor, çfarë ka ndodhur në analizë, por edhe në aspektin e një ristrukturimi dhe një menaxhimi më të mirë elektoralo-organizativ të opozitës në të ardhmen”, u shpreh Mediu.
Sipas kreut të PR-së, opozita duhet të vazhdojë me denoncimin e vjedhjes së zgjedhjeve dhe të mos heqë dorë sepse përndryshe bën “krim” ndaj qytetarëve shqiptarë.
Sa i takon parlamentit që do të rifillojë të enjten punën, Mediu u shpreh: “Mblidhet nesër për të mos folur”.
Sipas tij në rendin e ditës ka vetëm disa pika për t’u kaluar procesverbalet.
“Ky parlament është i çuditshëm dhe do të vazhdojë të jetë i çuditshëm në shtator”, përfundoi Mediu./tvklan.al
