Dhjetë kandidatë të Partisë Demokrate për zgjedhjet presidenciale 2020, mbajtën një debat të zjarrtë të mërkurën mbrëma, në qendër të të cilit ishte kërkesa për largimin e presidentit republikan Donald Trump, pas një mandati në Shtëpinë e Bardhë.
Vëmendjen e tërhoqi menjëherë senatorja Elizabeth Warren, një ligjvënëse përparimtare nga shteti verilindor Massachusetts, e cila sipas anketave kombëtare, i është afruar më shumë ish-nënpresidentit Joe Biden, një favorit demokrat për t’ju kundërvënë presidentit Trump në zgjedhjet e 3 nëntorit të vitit 2020.
Ajo tha se dëshiron “t’ua kthej qeverisjen qytetarëve”. Warren tha më pas se mbështet një sistem shëndetësor të drejtuar nga qeveria që do t’u jepte fund sigurimeve shëndetësore private. Disa kandidatë demokrat dhe shumica e republikanëve, përfshirë presidentin Trump, i kundërvihen një ndryshimi të tillë, duke e cilësuar të kushtueshëm dhe të gabueshëm për vendin.
Por, senatorja Warren, një ish profesoreshë e së drejtës në Harvard, tha se “kujdesi shëndetësor është një e drejtë themelore e njeriut dhe unë do të luftoj për të drejtat themelore të njeriut”.
Ish sekretari i strehimit, Julian Castro, senatori Cory Booker nga New Jersey dhe kandidatët e tjerë, bënë thirrje për ndryshime të mëdha në politikat e emigracionit, duke ngritur shumë kundërshtime ndaj mënyrës së si presidenti Trump është përpjekur të bllokojë emigrantët e Amerikës Qendrore për të hyrë në Shtetet e Bashkuara dhe për të kërkuar strehim.
“Ne nuk duhet ta kriminalizojmë dëshpërimin” e emigrantëve për të arritur në Shtetet e Bashkuara, tha Castro, i cili shpesh filloi përgjigjet e tij në spanjisht përpara se t’i përsëriste në gjuhën angleze.
Ai tha se fotoja e kësaj jave e një babai nga El Salvadori dhe së bijës 23 muajshe të mbytur në lumin Rio Grande në kufirin jugor të Shteteve të Bashkuara me Meksikën “është zemërthyese … dhe duhet të na zemërojë të gjithëve”.
Debatit ju bashkuan edhe senatorja Amy Klobuchar nga Minnesota, ish-ligjvënësi Beto O’Rourke i Teksasit dhe pesë kandidatë të tjerë që derisa po debatonin politikat e njëri tjetrit, sulmuan presidentin Trump dhe qëndrimin prej 29 muajsh në Shtëpinë e Bardhë.
“Emigrantët nuk e dëmtojnë Amerikën,” tha senatorja Klobuchar gjatë debatit, duke shtuar megjithatë se disa kufizime kufitare duhet të mbeten për të penguar trafikantët.
Për shumë amerikanë, kjo ishte mundësia e parë për të parë dhe vlerësuar shumë nga kandidatët presidencialë demokratë dhe për te shqyrtuar nëse ata do të donin ndonjërin prej tyre si një alternativë ndaj presidenti Trump, fituesi i papritur i zgjedhjeve të vitit 2016.
Dhjetë pretendentë tjerë demokrat do të debatojnë të enjten, përfshirë edhe Joe Biden, senatorin Bernie Sanders, Kamala Harris nga California dhe shtatë të tjerë./ Opinion.al
