Parlamentit Evropian ka pezulluar ditën e sotme kandidaturën e hungarezit Lazlo Troshanji si komsioner për zgjerimin, e gjithashtu atë të rumunes Rovana Plumb, e propozuar nga Ursula Von Der Lejen për postin e Komisioneres së Transportit.
Sipas Komisionit për Çështjet Ligjore i Parlamentit Evropian, kandidatura e tyre ka konflikt interesi, duke refuzuar për herë të parë Von Der Lejen që prej emërimit si Presidente e KE.
Ky vendim u mor gjatë seancës së konfirmimit të zhvilluar me dyer të mbyllura. Mina Andreeva, zëdhënëse e KE, tha: “Kjo nënkupton se për momentin procedura pezullohet. Por, vendimet e komisionit nuk nënkuptojnë se tashmë duhet të propozohet automatikisht një kandidat i ri”.
Ndërkohë, ajo ka theksuar se hapat e mëtejshme do të varen nga mënyra se si do të procedojë Parlamenti në koordinim me Von Der Lejen.
Ky vendim është dhe një “shuplak” për kryeministrin euroskeptik të Hungarisë, Viktor Orban, i cili është kritikuar vazhdimisht nga europarlamentarët porsa i përket sundimit të ligjit në shtetin e tij./ Opinion.al E.Xh.
