Komisioni i Pavarur i Kualifikimit shkarkoi nga detyra prokurorin e Tiranës, Ndini Tavani, kandidat për SPAK. Në seancën dëgjimore, KPK konstatoi probleme me justifikimin e disa pasurive të prokurorit.
Kështu me shumicë votash, Komisioni vendosi shkarkimin e tij.Prokurori Ndini Tavani zotëronte pasuri familjare prej 6.8 milionë lekësh në vitin 2006, kur deklaroi interesat e tij private për herë të parë në ILDKPKI. Ai deklaronte asokohe pjesë takuese prej 1/3 e një apartamenti si dhe kursime prej 2.5 milionë lekësh të siguruara nga avokatia.Në fund të vitit 2017, pasuria familjare e deklaruar nga prokurori Tavani është 12.1 milionë lekë, me një rritje mesatare prej 442 mijë lekësh në vit.
Ajo ndahet në 8.8 milionë lekë pasuri të patundshme, automjete me vlerë 2.2 milionë lekë, 90 mijë lekë likujditete bankare si dhe rreth 889 mijë lekë kursime në cash. Të ardhurat familjare për periudhën deklaruese janë 19.1 milionë lekë. Ndër to, paga nga funksioni i prokurorit i Tavani zë 64%, ndërsa paga e bashkëshortes rreth 32% të totalit. Rreth 2% e të ardhurave kanë si burim mësimdhënien, ndërsa prokurori deklaron edhe vlera të vogla si dhuratë.
Ndini Tavani njihet si një nga prokurorët që ka hetuar dosjet më të nxehta. Ai u transferua në vitin 2012 nga Prokuroria e Vlorës në atë të Tiranës me firmë të kryeprokurores Ina Rama si pjesë e Task-Forcës anti-korrupsion. Tavani ka hetuar ish-ministrin e Punës, Spiro Ksera, dosjen e arrestimit të ish-shefit të Krimeve të Rënda, Fatos Goxhaj si dhe ish-Guvernatorin e Bankës së Shqipërisë, Ardian Fullani për disa tendera.
Ndërkohë presin vettingun nga lista e kandidatëve për në SPAK Anton Martini, Elizabeta Ymeraj dhe Doloreza Musabelliu. Për Anita Jellen seanca është shtyrë./ Opinion.al
