Lëndë narkotike të trafikuara përmes postës. Rasti i paprecedentë është njoftuar nga policia, e cila ka arritur të finalizojë operacionin e koduar “Green mail”.
Pakoja me lëndë narkotike është sjellë nga Anglia në Tiranë nëpërmjet postës dhe për këtë rast janë vënë në pranga dy persona A.Gj., 34 vjeç, me precedent të mëparshëm penal për tentativë vrasjeje, dhe H. F., 64 vjeçe, të dy banues në Tiranë.
Këta shtetas janë kapur në flagrancë nga oficerët e Policisë, në rrugën “Hiqmet Buzi”, me pakon me peshë 1 kilogram e 223 gramë, e cila u sekuestrua në cilësinë e provës materiale.
Nga hetimet ka rezultuar se shtetasi A.Gj. e ka siguruar pakon me lëndë të dyshuar narkotike nga Anglia, nëpërmjet postës, ndërsa bashkëpunëtorja e tij H.F., ish-punonjëse e postës, ka marrë në postë pakon të dërguar në emër të shtetasit A.Gj.
Gjatë kontrollit në banesën e shtetasit A. Gj., shërbimet e Policisë kanë gjetur dhe sekuestruar në cilësinë e provës materiale një tjetër pako me lëndë narkotike cannabis sativa, me peshë rreth 75 gramë, një shumë parash të dyshuar të përfituar nga kjo veprimtari kriminale dhe sende të tjera të kundërligjshme.
Vijojnë veprimet hetimore për dokumentimin e plotë të kësaj veprimtarie kriminale, idnetifikimin dhe kapjen e personave të tjerë të përfshirë.
