Kamza prek fundin ndaj Lushnjes për 10 minuta, e shpëton vetëm Plaku

Kamza është përballur me Lushnjen në takimin e vlefshëm për javën e 30 në Kategorinë Superiore. Fitorja ishte e detyrueshme për ekipin e Ahmataj, pasi luhej ndaj vendit të fundit dhe pas një serie negative rezultatesh, ndaj Lushnjes nuk tolerohej asnjë hap i gabuar.
Në formacionin e hedhur nga minuta e parë, trajneri i Kamzës i ka besuar sërisht Filit, ndërsa nga krahu tjetër nuk kishte ndryshime nga ana e Gjylës. Megjithatë në pjesën e parë Fili nuk e ka justifikuar besimin e trajnerit, teksa në një episod të veçantë të takimit, nuk ka arritur të ndjek aksionin pas shërbimit perfekt nga ana e Plakut. Shanset e tjera për vendasit ishin me goditjet nga distanca, ndërsa edhe miqtë provuan disa zbritje të rrezikshme.
Pjesa e dytë ka nisur menjëherë me ritëm në këtë takim, teksa Plaku ka gjetur avantazhin me një gjuajtje të bukur nga distanca. Sefa ka krijuar iluzionin e një makthi për vendasit, të cilët janë rikthyer te avantazhi sërish në minutën e 86 me anë të Plakut, 10 minuta pasi Lushnja kishte barazuar përkohsisht. Kjo ishte fitorja e parë edhe për trajnerin Ahmataj, që merr pikë të rëndësishme për misionin e mbijetesës.