Atleti shkodran që ka bërë krenarë të gjithë shqiptarët me arritjen e tij në Beograd ku u shpall Kampion i Evropës për kërcimin për së gjati me rekordin 8.08, mëngjesin e sotëm është kthyer në atdhe. Në pritjet e tij në aeroport ishin mbledhur miq dhe familjarë por mungonin zyrtarë të Ministrisë së Sportit.
Në deklaratën e tij për mediat, Smajlaj premtoi titullin Kampion Bote në rast se shteti do të ndihmojë më shumë atletikën.
“Falënderoj të gjithë, familjen time dhe shokët e mi. Kisha besim tek vetja dhe kjo ishte një garë e fortë. Sot jam i emocionuar kur shoh të gjithë shokët këtu. Medalja shkon për të gjithë shqiptarët. Jam stërvitur për 4 javë në Stamboll dhe më pas në “Loro Boriçi”, shpresoj të bëhet më mirë. Falënderoj shtetin që ktheu sytë nga atletika, por nëse bën akoma më shumë premtoj se do të jem Kampion Bote”, tha 23-vjeçari.
Ndërkohë trajneri i tij Vildan Tufi tregoi se e kishte parandjerë kërcimin mbi 8 metra të Smajlajt, edhe pse pak veta e besonin. “Kam besuar gjithmonë tek Izmiri, madje dikujt i dukej e pamundur kur kam thënë se do kërcejë mbi 8 metra”, u shpreh ai.
Presidenti i Federatës së Atletikës, Gjergj Ruli, gjithashtu u shpreh optimist për mundësitë e fitimit të një medaljeje edhe në Kampionatin Botëror në Londër. “Nëse do të stërvitet mirë, do të dalë Kampion Bote në Londër. Izmiri i ka mundësitë për të marrë medalje në Londër”, tha Ruli.
