Gjithmonë ka një kuriozitet që na shoqëron. Ku po shkon? Për kë parti voton? Për kë skuadër bën tifo? Është normale që një pyetje si kjo e fundit ti bëhet edhe kryetarit të bashkisë që një qyteti me 1 milion banorë siç është Tirana. Aq më shumë kur Tirana edhe pse ka 3 ekipe elitare futbolli, Bashkia e saj është aksionere në Klubin e Futbollit të Tiranës, edhe pse taksat i paguajnë njësoj si qytetarët që bëjnë tifo për Partizanin ashtu edhe ata të Dinamos, por që realisht nuk marrin asgjë nga buxheti i Bashkisë edhe pse janë ekipe të kryeqytetit. Por për kë bën tifo Erion Veliaj, kryetari i Bashkisë së Tiranës?
Në ditën e “përurimit” të stadiumit “Selman Stërmasi” të rikonstruktuar, Erion Veliaj tha për mikrofonin e “Procesi Sportiv”, se do të hapte “dyert” e këtij stadiumi edhe për Partizanin, duke shpalosur edhe një politikë të re premtuese për gjithë sportin elitar të Tiranës. “Për derbin e kryeqytetit, TiranaPartizani, besoj se do të jetë gjithçka gati në këtë impiant sportiv dhe do të inaugurohet. Si ortak në minorancë i KF Tiranës tregohem shumë i kujdesshëm që të mos i ngatërroj përgjegjësitë. Si bashki, jemi të gatshëm për të promovuar sportin. Partizani është sot ekipi i kryeqytetit, që po ecën më mirë, ndërsa Dinamo është një kategori më poshtë. Kemi ekipe të jashtëzakonshme, edhe të tjera, në Farkë dhe në Dajt. Kjo do të thotë se sot, Tirana e madhe është shtëpi e mbi 10 ekipeve elitare.”
Kryebashkiaku Erion Veliaj, ndërsa pranon se është tifoz me Partizanin, ndryshe nga e kaluara, premton mbështetje financiare për të gjitha ekipet elitare të kryeqytetit.
“Shikoni, unë jam familje ushtarakësh. Jam rritur me dashurinë për Partizanin, të paktën nga prindërit. Gjatë kohës me mandat të kryebashkiakut të kryeqytetit jam ortak dhe aksioner i Tiranës. Si kryetar bashkie, kultura e re që duam të ndjekim si institucion, është promovimi i sportit në përgjithësi. Ndaj, në buxhetin e vitit tjetër, Bashkia e Tiranës do të tregohet e kujdesshme. Përveçse të respektojë aksionet që ka te Tirana, do të japë financim edhe për Partizanin, edhe për Dinamon, edhe për ekipin e mrekullueshëm të volejbollit që kemi në Farkë, edhe për ekipin e Dajtit”, tha Veliaj.
