Antonis Nikopolidis, portieri i ekipit kombëtar grek, ishte kampion i Europës në vitin 2004, ndërsa tani është drejtor teknik i “Hope Refugees FC”, ekipi që sjell shpresë për një grup refugjatësh në Greqi, të cilët presin një destinacion për të vijuar jetën. Tri herë në javë, 24 refugjatë të rinj largohen nga qendrat e pritjes në kryeqytetin grek për t’u trajnuar me klubin “Hope”. Dhe të mendosh që këtë ekip e drejton një legjendë e futbollit helen, Antonis Nikopolidis, portieri i kësaj kombëtareje, që duke u bazuar në lojën mbrojtëse, bëri një nga surprizat më të mëdha në historinë e futbollit botëror, duke fituar “Euro 2004”, pasi mundi Portugalinë e Cristiano Ronaldos në Lisbonë.
“Kur e mora përsipër punën, kam pranuar me kënaqësi t’i stërvis këta fatkeqë, refugjatë, që kanë ikur nga lufta dhe janë në kërkim të një vendi të paqtë. Kjo më bën të ndjehem plot gëzim, se drejtoj një ekip njerëzish që vuajnë, refugjatë, të cilët janë shpërngulur nga vendet e tyre”, – tha Nikopolidis. Ish-portieri veteran shton një arsye më shumë për pjesëmarrjen e tij në këtë project, sepse paraardhësit e tij ishin, po ashtu, edhe refugjatë (turqit e bregut të zi të detit), të cilët erdhën në Greqi në vitet e njëzeta të shekullit të kaluar. Orët e trajnimit dhe ndeshjet në fundjavë janë momentet më të mira të jetës në një kamp, ku këta “lojtarë” nuk kanë zgjedhur të kalojnë ditën duke mos bërë asgjë, në pritje të pafundme për të marrë ndonjë lajm në lidhje me kërkesat e tyre për zhvendosje diku tjetër.
Joseba Jatsebo, 23 vjeç, është një nga 24 të rinjtë me kombësi siriane, irakene, afgane dhe iraniane, të moshës mes 18 dhe 26 vjeç, që largohet nga kampet Eleonas në qendër të Athinës dhe stërvitet në stadium, në kushte normale, disa orë në javë. Ndryshe nga shumica e kolegëve të tij, të cilët nuk kanë përvojë si futbollistë, Jatsebi ishte lojtar i një ekipi lokal në qytetin e tij, Idlib të Sirisë, tashmë i rrënuar nga lufta civile. “Për fat të keq, për shkak të luftës, ëndrra ime nuk mund të vazhdonte,” – tha Jatsebi Efe. Ai mbërriti në Greqi një vit më parë, si qindra-mijëra refugjatë, nga përtej detit, me një barkë. Tani jeton në kampin e refugjatëve “Skaramagas”, prej nga shpreson të zhvendoset. Nuk ka preferenca në destinacionin e ardhshëm, vetëm të “ketë një të ardhme të mirë.”/telesport
