Kryeministrja e Hong Kongut Carrie Lam është shprehur se qeveria “do të reflektojë seriozisht”, pasi kandidatët pro demokracisë shënuan fitore të thellë në zgjedhjet lokale.
Sipas mediave 17 nga 18 këshillat e qarqeve do të kontrollohen tani nga këshilltarët pro demokracisë.
Zgjedhjet e së dielës në Hong Kong kanë qenë të parat që prej nisjes së valës së protestave kundër regjimit të Pekinit rreth gjashtë muaj më parë.
Pjesëmarrja në këto zgjedhje ka qenë 71%. Rezultati shihet si një ‘qortim’ i ashpër ndaj zonjës Lam dhe si shfaqje e mbështetjes për lëvizjen protestuese.
Në deklaratën e lëshuar të hënën, Lam tha se qeveria do të respektojë rezultatin e zgjedhjeve.
Sipas saj, shumë mendojnë se rezultati “pasqyron pakënaqësinë e njerëzve me situatën aktuale dhe problemet e thella në shoqëri”.
Këshilltarët e rretheve kanë pak fuqi politike dhe kryesisht merren me çështje lokale.
Por këshilltarët gjithashtu duhet të zgjedhin 117 vetë nga rrethet e tyre, për t’u ulur në komitetin prej 1,200 anëtarësh që zgjedh shefin ekzekutiv të Hong Kongut.
Hong Kongu është pjesë e Kinës në bazë të politikës “një shtet, dy sisteme”./Opinion.al/
