Një aksident i rëndë është regjistruar sot në komunën e Gjilanit në Kosovë, si pasojë e të cilit humbi jetën një person ndërsa 16 të tjerë kanë mbetur të plagosur. Shumica e të plagosurve po marrin ndihmë mjekësore në spitalin rajonal të Gjilanit, ndërsa tre prej tyre janë dërguar në Qendrën Klinike Universitare të Kosovës.
Gjithçka ndodhi në orët e pasdites, teksa një kamion shkaktoi një aksident zinxhir në qytet duke përplasur disa automjete. Shkak i aksidentit dyshohet të ketë qenë një defekt teknik në kamion, çfarë ka bërë që drejtuesi i tij të humbë kontrollin dhe të futet mes makinave. Policia ka vënë në pranga drejtuesin e kamionit dhe pasagjerin që udhëtonte me të, teksa ka nisur hetimet për aksidentin.
Ngjarja e rëndë ka sjellë edhe reagimin e krerëve më të lartë të shtetit dhe institucioneve.Përmes një statusi në rrjetin social Facebook, kryeministri Ramush Haradinaj u ka bërë thirrje organeve përgjegjëse që të ndërmarrin të gjitha veprimet për ta hetuar rastin.
“U bëjë thirrje organeve përgjegjëse që të ndërmarrin të gjitha veprimet e nevojshme për ta hetuar rastin dhe për të parandaluar që rastet e tilla të ndodhin në të ardhmen. Qeveria e vendit, institucionet përkatëse, janë në gjendje gatishmërie për të ofruar gjithë ndihmën e nevojshme, për të prekurit nga kjo tragjedi”./B.K Opinion.al
