Policia ka vënë në pranga një person i cili akuzohet për vjedhje. Ai është zbuluar nga kamerat e sigurisë duke vjedhur nga çanta e një qytetareje telefonin iPhone XS Max. Në pamjet filmike personi shfaqet i qetë duke ecur pas qytetares dhe në një moment zgjat dorën duke i marrë telefonin.
Policia ka bërë identifikimin e tij dhe rezulton se ai është 37 vjeç, i lindur në Vlorë dhe banues në Tiranë. Gjithashtu ky person ka qenë i dënuar më parë me 18 muaj burg për vjedhje. Ai dyshohet edhe për vjedhje të tjera, të kryera në këtë formë.
Policia ka njoftuar se ka arrestuar gjithashtu dy shtetas 34 dhe 25 vjeç, të cilët dyshohen se kanë kryer një sërë vjedhjesh në Tiranë.
“Të dy, duke përdorur çelësin e banesës së shtetases L.A, kanë vjedhur në kohë të ndryshme, gjatë muajit korrik dhe gusht të këtij viti lekë, euro, bizhuteri, celularë, një kartë bankomati në emër të shtetases L. A., me anë të së cilës kanë kryer tërheqje lekësh në bankomat nga llogaria e kësaj shtetaseje.
Ata dyshohet gjithashtu se kanë kryer vjedhje të një marketi, një varëse floriri, të cilën ja kanë marrë nga qafa një shtetaseje dhe vjedhje banesash, për të cilat vijon puna për dokumentimin e tyre”, thuhet në njoftimin e Policisë së Shtetit. /Opinion.al
