Një grabitje me maska ka ndodhur në Sheraton rreth orës 16:00, ndërsa pre ka rënë një kambist. Mësohet se kambisti ka tërhequr 18 milionë lekë në filialin e një banke të nivelit të dytë që ndodhet në këtë hotel, dhe autorët e grabitjes të cilët me sa duket kanë qenë në dijeni të trnasfertës së parave, po e prisnin për të krhyer grabitjen.
Sakaq, po sipas burimeve policore bëhet e ditur se kambisti ka qenë i shoqëruar me një person tjetër.
Sipas gazetares së ‘News 24’, Dorjana Bezat, një person i maskuar ka dalë përpara lulishtes së këtij hoteli, pasi kambisti me inicialet S.H., po shkonte në pikën e këmbimit valutor dhe u ka rrëmbyer çantën me para nga dora. Më pas, hajduti është larguar në drejtim të paditur me motor, që drejtohej nga një tjetër person, i cili e priste para hotelit.
Fill pas kësaj ngjarje, në vendin ku ndodhi grabitja mbërritën forca të shumta policore, të cilat po vijojnë hetimet për identifikimin dhe kapjen e autorëve të ngjarjes.
GAZETARI ARTAN HOXHA DËSHMITAR I NGJARJES: GRABITJA, SI NJË SKENË FILMI
Gazetari investigativ, i emisionit ‘Xhungël’ në “News 24” ka qenë sot dëshmitar i grabitjes së ndodhur pak minuta më parë në hotel Sheraton. Sipas Hoxhës, ngjarja i ngjante një skene filmi, ndërsa një person maskuar dhe armatosur u ka prerë rrugën dy personave, njëri prej të cilëve mbante një çantë në dorë, dhe u ka kërkuar atyre që ti jepnin lekët.
““Dalin dy persona një në moshë më të re, dhe një tjetër. Kanë kaluar të lulishtja para hotelit, dhe në dorën kishin çantën me para. Ata i priste para hotelit një mjet me të cilin ata do të lëviznin. Një djalë me pistoletë në dore drejtohet tek ata dhe bërtet, “dorëzoni paratë”. U erdhi nga para me vrap. Ka marrë paratë dhe me vrap ka dalë në rrugën përpara hotelit, e priste një motor, dhe pasi hipi u largua. Motori me dy djemtë kishte lëvizur disa herë para hotelit duke monitoruar situatën. Pra grabitësit kanë pasur informacion se do të bëhej një transfertë parash, në sasi të konsiderueshme. Kanë ditur edhe orarin kur do ndodhte kjo. Mënyra sesi është bërë grabitja është pak e çuditshme. Personi që priste me motor nuk kishte maskë. Besoj se kamerat e sigurisë aty rrotull duhet ta kenë fiksuar pamjen dhe lëvizjen e të rinjve me motor”, rrëfeu Artan Hoxha.
POLICIA JEP DETAJE TË REJA PËR GRABITJEN E KAMBISTIT
Më datë 26.04.2016, rreth orës 16:10, në rrugën “Dervish Hima”, tek ambientet e jashtme të një subjekti privat, ka ndodhur një vjedhje me dhunë. Shtetasit S. H., i është marrë një shumë monetare e konsiderueshme, nën ushtrimin e dhunës, shumë të cilën sapo e kishte tërhequr nga një degë banke e nivelit të dytë. Në vendin e ngjarjes grupi hetimor po punon për zbardhjen e mekanizmit dhe identifikimin e autorëve. Po kqyren kamerat per te pare si ka ndodhur ngjarja./BW
