Një dentiste në Tiranë është kthyer në shenjestër të një sulmi seksual nga një burrë i identifikuar tashmë nga policia dhe prokuroria. Ai është 42-vjeç nga Skrapari, i martuar dhe me banim në Tiranë në zonën e Astirit. Denoncimi është bërë nga mjekja stomatologe me inicialet D.B.
Prokuroria ka marrë si të pandehur shtetasin me iniciale V.Sh. i cili akuzohet për “Përdorimit me keqdashje të thirrjeve telefonike”. Mësohet se V.Sh, përdorte një numër telefonik të rregjistruar në emër të gruas së tij, me të cilin ngacmonte në orare të ndryshme femrat, mes tyre edhe një dentiste.
Prokuroria e Tiranës thotë se në datën 11 dhjetor 2017 dentistja ka marrë një mesazh me teks: “mua këtë numër ma ka dhënë një person që të ka ty në dorë se të ka parë dhe filmuar me dashnorin…”.
Por dentistja i ka kthyer sms duke i bërë me dije se keni ngatërruar numër dhe mos më shqetëso më. Por në të njëjtën ditë është dërguar serish një sms me tekst: “…të kam ty lakuriq dhe zogun tënd duke u puthur me të, a do fotografinë apo videon…”.
Pas kësaj sms dentistja ka vënë në dijeni vëllain e saj shtetasin E.K, si dhe bashkëshortin e saj N.B. dhe pas kësaj bashkëshorti i saj ka telefonuar dërguesin e sms-ve V.SH, por ky i fundit nuk i është përgjigjur.
Pas kësaj dentistja i është drejtuar policisë ku ka bërë kallëzim penal, duke kërkuar ndjekje penale për personin që e shantazhonte në telefon. Nga hetimet e kryera ka rezultuar se V.SH, është lokalizuar në zonën e Astirit Tiranë. Pas gjurmimit të tij, u konstatua se numri që ai përdorte për të ngacmuar e shantazhuar gra të ndryshme në Tiranë ishte i regjistruar në emër të bashkëshortes së tij.
