Janë 23 persona të arrestuar për protestën në Rrugën e Kombit, mes tyre edhe të moshuar. Një djalë që qendron përpara Drejtorisë së Policisë së Tiranës thotë se “babai i tij, 67 vjeç u arrestua mbrëmjen e së shtunës dhe mbahet ne izolim pa asnjë arsye, vetem se mori pjesë në protestë”. Ai thotë se policia nuk ka lejuar ta takojë.
Protestuesit e arrestuar në Kukës janë transportuar në kryeqytet, duke u izoluar në Drejtorinë e Policisë së Tiranës e në disa prej komisariateve të kryeqytetit.
Pas transportimit të qytetarëve të arrestuar nga Kukësi në Tiranë mbrëmjen e djeshme, familjarët, por edhe qytetarë të ndryshëm të kryeqytetit kanë nisur një tubim, duke protestuar para Drejtorisë së Policisë së Tiranës. Familjarët dhe qytetarët kanë kërkuar lirimin e të arrestuarve nga Policia. Protesta mbështetet edhe nga deputetë të PD dhe LSI-së.
“Edi Rama, lironi djemtë tanë! Kriminelë, hajdutë! Jemi mbledhur, se nuk jemi dakord me këtë taksë, e para, të lirohen vëllezërit tanë dhe taksa të rishikohet, sa herë të rregullohet atje, do të digjet prapë. Nesër do të jemi prapë atje”, deklaroi një prej pjesëmarrësve.
“Nuk jemi për parti, jemi kundër prishjes së pronës private, por ajo dje ishte pronë hajdute. Nëse është shtet, ai vjen ditën dhe hyn në shtëpi dhe jo natën. Ne kemi prishur objektin e hajdutëve, jo atë private. Rama të marrë masa të lirojë djemtë, se protesta do të përshkallëzohet”, bëri thirrje një tjetër protestues.
