Mbrojtësi i Liverpoolit, Virgil Van Dijk, sot është një ndër lojtarët më të kërkuar në botën e futbollit. Van Dijk shkoi te të kuqtë në janar të vitit 2018, duke dhënë rezultate pozitive për skuadrën e Jurgen Klopp.
Momentalisht, mbrojtësi i Liverpool ndodhet në Holandë, pasi është grumbulluar me kombëtaren për ndeshjen me Gjermaninë.
Gjatë një interviste për mediat vendase, Virgil Van Dijk, ka rrëfyer disa nga ditët e tij më të vështira, pasi ka kaluar një problem serioz me shëndetin e tij.
Mbrojtësi i “kuq”, shprehet se në ditët që ndodhej në spital kishte menduar se do të vdiste, madje kishte nënshkruar dhe një testament për t’i lënë pasurinë mamasë së tij.
“Për herë të parë në jetën time, futbolli nuk ka patur asnjë kuptim. Kam parë vdekjen në sy. Mendoja vetëm se si të isha gjallë. Unë dhe nëna ime u lutëm dhe mendonim shumë skenarë për të ardhmen. Më kujtohet kur isha shtrirë në krevatin e spitalit dhe shihja vetëm fije dhe tuba në trupin tim. Ishte sikur asgjë nuk funksiononte. Nuk mund të bëja asgjë, ishte një kujtim ndër më të shëmtuarit në jetën time.
Atë kohë firmosa dhe një testament që shprehte vullnetin tim. Ia lashë mamasë time të gjitha paratë që kisha grumbulluar nëse do të vdisja. Ishte një gjë që duhej bërë edhe pse nuk donim ta mendonim si opsion”, ka thënë Van Dijk./ Opinion.al. E.Xh.
