Disa herë emisioni “Stop” ka transmetuar denoncime për Suzana Isufajn, me pretendimin se ajo përmes dokumenteve të parregullta ka përfituar prona, që nuk i takojnë. Silvi Golja një i afërm i Suzanës, dëshmoi nga Kanadaja se Isufaj e ka dhënë pronën e babait të tij me qira në vitin 2021 mbi bazën e një prokure, që i ati Agron Golja i kishte dhënë Suzanës për përfaqësim në gjyqe, por që kishte skaduar në vitin 2017.
Të ardhurat e qirasë së pronës me 25 bashkëpronarë i merr vetëm Suzana Isufaj. Gjithçka nisi me një kërkesë-padi të Janarit 2012, me të cilën Suzana Isufaj kërkon të godasë një vendim të vitit 2007 të Agjencisë së Kthimit të Pronave.
Përmes këtij procesi gjyqësor Suzana synonte të bëhej pronare e 100 hektarëve pronë, anës detit në Ksamil. Prona kap vlerën e tregut rreth 300 milionë euro. Palë në procesin e mbyllur në kohë rekord, për 3 muaj, kanë qenë Agjencia e Kthimit të Pronave dhe Avokatura e Shtetit, 2 institucione Kushtetuese, që mbrojnë interesat e shtetit shqiptar.
Ka dyshime se firma e përfaqësuesit të Avokaturës së Shtetit Kristaq Kutra ishte e falsifikuar, nëse krahasohet me të tjera nënshkrime të tij. Trupi gjykues me kryesues Alltun Cela dhe anëtarë Nevrie Duka dhe Petrit Aliaj, vendosën pranimin e kërkesës së Suzana Isufaj Cini, duke e bërë pronare të 100 hektarëve prona në Ksamil.
Ish-kryetari i Gjykatës Sarandë Alltun Çela, iu shmang shpjegimit duke thënë, se nuk i kujtohej rasti. Menjëherë pas transmetimit tonë, Avokatura e Shtetit falenderoi emisionin “Stop”, duke rivendosur afatet për këtë vendim, që tani do të apelohet nga ky institucion shtetëror.
