Është pezulluar nga detyra punonjësi i Policisë së Shtetit, Vladimir Muja, i cili u denoncua nga emisioni “STOP” në TV Klan mbrëmjen e sotme për një aferë korruptive në doganën e Morinës.
Bëhet me dije se Drejtori i Policisë Kufitare Kukës ka pezulluar menjëherë efektivin Muja nga detyra.
Mësohet se hetimet janë shtrirë edhe për identifikimin e punonjësit tjetër, kontrollor, i cili dyshohet të jetë i implikuar në aferë.
“Me urdhër të Drejtorit të Policisë së Shtetit ka filluar hetimi disiplinor dhe çështja i ka kaluar për ndjekje Drejtorisë së Standarteve Profesionale në Policinë e Shtetit. Gjithashtu ka nisur një hetim nga SHÇBA, për të nxjerrë përgjegjësitë penale. Hetimet janë shtrirë edhe për identifikimin e punonjësit tjetër, kontrollor, i cili dyshohet të jetë i implikuar në aferë”, citohet nga deklarata e policisë.
Kamera e fshehtë e emisionit “STOP” tregon me zë e figurë, sesi mund të bësh kontrabandë në doganën e Morinës.
Një qytetar takon punonjësin e doganës, Vladimir Muja dhe ky i fundit i tregon fill e për pe, sesi mund të sjellë makina të vjedhura nga Serbia apo vende të tjera dhe për 300 euro t’i kalojë në Shqipëri, pa i hyrë gjemb në këmbë.
