Komisioni i Pavarur i Kualifikimit (KPK), ka konfirmuar në detyrë prokurorin në Prokurorinë e Përgjithshme, Arben Kraja. Kraja është i njohur si prokurori që hetoi dosjen për abuzimet me fondet e rrugës Durrës-Kukës, ku u hetua dhe Lulzim Basha.
Trupa gjykuese e përbërë nga Firdes Shuli, Roland Ilia dhe Etleda Çiftja kanë paraqitur rezultatet e hetimit për Krajën, që u bazua në 3 shtylla, aftësitë profesionale, kriteri moral dhe verifikimet për pasurinë. KPK bëri me dije se sipas relacionit të ILDKPKI, prokurori Arben Kraja, ka deklaruar saktë pasurinë dhe burimet e saj.
Skeda e pasurisë
Sipas ILDKPKI, deklarimi i pasurisë nga ana e prokurorit Arben Kraja ishte i saktë dhe në përputhje me ligjin. Kraja zotëron një shtëpi në Shkodër me sipërfaqe 117 m2 dhe truall 542 metra katrorë të përfituar përmes trashëgimisë. Kjo shtëpi është blerë nga prindërit e prokurorit në vitin 1956.
Kraja zotëron gjithashtu një apartament në rrugën “Qemal Stafa” në Tiranë me vlerë 56 mijë euro si dhe 16.6 për qind pjesë takuese në një sipërfaqe toke në Gjirin e Lalzit në Durrës, e blerë për 466 mijë lekë.
Komisioni i Pavarur i Kualifikimit ka vlerësuar se prokurori Arben Kraja kishte burime të ligjshme financiare për pronat e mësipërme. I njëjti konstatim është arritur për një makinë të blerë për 2 mijë euro nga bashkëshortja dhe një autoveturë tip Benz me vlerë 500 mijë lekë.
Prokuri Kraja ka deklaruar se ka paguar këstin e parë prej 15 mijë eurosh të një apartamenti në Gjirin e Lalzit, vlera totale e së cilës është 130 mijë euro. Sipas KPK, Kraja ka burime të ligjshme për pagesën e këstit të parë. I pyetur nga Komisioni për qëndrimin e tij, prokurori Arben Kraja u shpreh se falënderon trupën gjykuese për objektivitetin dhe kërkoi konfirmimin në detyrë.
