Deputetja e PD, Albana Vokshi është marrë në pyetje ditën e sotme nga SPAK, si një ndër personat që ka dijeni mbi kallëzimin e dorëzuar në 12 maj ndaj kryebashkiakut të Kuçovës për shpërdorim detyre dhe kanosje të pjesëmarrësve në zgjedhje.
Vokshi ka depozituar në emër të Partisë Demokratike denoncimin ku pretendohet se Kreshnik Hajdari ka shpërdoruar detyrën duke përdorur fondet e bashkisë së Kuçovës për të ndikuar në vullnetin e zgjedhësve.
Në një dalje për media Vokshi, tha se Hajdari ka shfrytëzuar burimet financiare të bashkisë që drejtonte duke caktuar dyfishin e shumës së nevojshme për projekte pa asnjë cilësi në kuadër të fushatës elektorale.
“Hajdari ka shfrytëzuar burimet financiare dhe burimet njerëzore të bashkisë për përfitime elektorale. Ka disa video dhe prova që provojnë faktin që është shtruar asfalt elektoral dhe projekte pa tabelë në disa zona pa asnjë standart. Kanë qenë vetë banorët e zonës që kanë ndalur këto punime sepse po bëheshin pa standarte. Ndërsa punimet janë bërë me dyfishin e vlerës. Ka video dhe prova konkrete ku shpërndahen thasët me miell derë më derë”, tha Vokshi./Opinion.al
