Përfaqësuesja e lartë e Komisionit Evropian për Punët e Jashtme dhe Sigurinë, Kaja Kallas, zhvilloi një vizitë të papritur në Mitrovicën e Veriut e banuar në shumicë nga serbët.
Ajo vizitoi selinë e gjykatës dhe më pas u takua me drejtorët e shkollave të veriut.
“Është e rëndësishme të jemi këtu në Veri të Kosovës, sepse u njohëm me rrëfime të ndryshme për të qenë vërtet dëshmitarë të asaj që po ndodh në terren. Isha në godinën e gjykatës. Gjykata po punon dhe po pret që gjyqtarët serbë të kthehen në detyrë. U takova edhe me përfaqësues të shkollave, për të kuptuar situatën, për të folur vërtet me njerëzit dhe për të parë me sytë e mi se çfarë po ndodh. Fola me drejtues të KFOR-it, EULEX-it për atë që shohin ata dhe mendoj se ky është një informacion jashtëzakonisht i rëndësishëm për t’u kuptuar. Sepse shohim që njëra palë thotë një gjë, tjetra thotë diçka ndryshe, por mendoj se forcat ndërkombëtare po japin kontribut për të ardhmen e begatë dhe të sigurt për të gjithë në Kosovë”, tha Kaja Kallas, përfaqësuese e BE për Politikën e Jashtme.
Bashkimi Evropian i ka bërë thirrje kryeministrit të dorëhequr, Albin Kurti, dhe autoriteteve të Kosovës që të ndalojnë mbylljen e institucioneve paralele serbe në veri, duke treguar vetëpërmbajtje dhe që të shmangin lëvizjet që mund të çojnë në përshkallëzimin e situatës.
Kallas tha se po punohet për heqjen e plotë të sanksioneve ndaj Kosovës, por kjo do të varet nga shtensionimi i situatës në Veri të vendit si dhe nga respektimi i marrëveshjes së Ohrit. Klan News
