Pas shkarkimit të Agim Kajmakut, bashkia e Vorës prej shtatë ditësh nuk ka një kryetar. Shkarkimi i Kajmakut u bë ditën e premte nga KQZ-ja, pasi ishte prekur nga ligji i dekriminalizimit.
Por, në një kohë kur presidenti Ilir Meta nuk dekreton një datë të re për ripërsëritjen e zgjedhjeve, e vetmja zgjidhje është që Këshilli Bashkiak të komandoj përkohësisht në krye të bashkisë një nga nënkryetarët.
Kujtojmë që në 3 muajt e tij në detyrë, Kajmaku kishte punuar me dy nënkryetarë: Aqif Muça dhe Laureta Omeri.
Bëhet me dije se pas publikimit të materialeve nga ana e Partisë Demokratike, ku vërtetohej se Kajmaku kishte probleme me ligjin e dekriminalizimt, marrëdhëniet mes tij dhe të deleguarës së PS në atë zonë, Belinda Balluku, nuk ishin të mira.
Pikërisht në kohën që Kajmaku ka kuptuar se shkarkimi i tij tashmë ishte vendosur, Abc News ka mësuar se të premten në mëngjes, ai ka shkuar në zyrën e tij, dhe ka shkarkuar dy nënkryetarët e bashkisë Aqif Mucën dhe Laureta Omerin.
Në vend të tyre, ka emëruar vetëm një nënkryetar bashkie, shefin e tij të kabinetit, Gent Picari. Në këto kushte, Këshilli bashkiak është i detyruar ta caktojë Picarin, të besuarin e Kajmakut, në krye të bashkisë.
Në këtë mënyrë, Kajmaku sposton partinë nga konkrolli i bashkisë, dhe e merr atë vetë gjithë influencën në institucion, edhe duke mos qenë kryetar./ Opinion.al
