Mjeku Tritan Kalo ditën e sotme ka kritikuar kryeministrin Edi Rama dhe kreun e Bashkisë Tiranë, Erion Veliaj, për situatën e transportit publik në kryeqytet.
Në një status në rrjetet sociale ai thotë se çdo mëngjes është i detyruar të presë 30 minuta në stacion, por përveç kësaj për shkak të mbingarkesës autobusët janë bërë burim i përhapjes së infeksionit.
Më tej, teksa e krahason kryeqytetin tonë me Kabulin, Kalo thotë se si taksapagues të rregullt qytetarët e Tiranës meritojnë të jënë të mirë trajtuar.
“Kohë kovidiane….26.08.2021….Zotërinj KM/ER dhe KB/EV. Ju mirëkuptoj për brengosjen ndaj Afganëve të sotëm, POR mos na nënvlerësoni edhe ne “ish Afganët e para 30 viteve”…. Nëse doni t’a nisni ditën me nerva të cingërisura, ju ftoj të merrni me mua çdo mëngjes linjën e Unazës për të shkuar në punë….E keni të garantuar pritjen më së paku 30 minuta në stacion, autobusa pa kondicioner që edhe breshka do t’ua kishte zili për “ecjen e tyre”, mbingarkesën në pasagjerë duke rritur rrezikun e transmetimit të virusit Sars-Cov2/Covid-19, etj, etj…. Mirë uji që na mungon nëpër çezma, pluhuri e papastërtia që gëlojnë kudo dhe kurdoherë, POR së paku të ndiheshim të mirëtrajtuar dhe mirëkuptuar si qytetarë taksapagues të rregullt në Kabulin/ Tiranën tonë….JU FALEMIMDERIT PËR MIRËKUPTIMIN tuaj edhe në këtë rast!!!!”, shkruan Kalo./Opinion.al
