Ambasada Amerikane në Kabul, përmes një njoftimi urgjent po u kërkon qytetarëve amerikanë të largohen nga Afganistani sa më shpejt të jetë e mundur për shkak të problemeve të sigurisë në vend.
Stafi i ambasadës në Kabul ka ikur nga Afganistani, sipas një urdhri të Departamentit të Shtetit të SHBA të lëshuar më 27 prill, duke e bërë të vështirë ofrimin e shpejtë të shërbimeve të urgjencës për qytetarët amerikanë.
“Ambasada Amerikane u bën thirrje qytetarëve amerikanë të largohen nga Afganistani menjëherë, duke përdorur fluturimet në dispozicion të aviacionit civil. Duke pasur parasysh situatën e pasigurt dhe zvogëlimin e stafit, aftësia e ambasadës për të ndihmuar qytetarët amerikanë në Afganistan është e kufizuar, madje edhe brenda Kabulit”, thuhej në deklaratë.
Ambasada tha se qytetarët amerikanë në Afganistan mund të përdorin kredi për riatdhesim nëse kanë probleme në blerjen e biletave.
“Vrasja e dhjetëra civilëve”
Të hënën, ambasadat amerikane dhe britanike në Kabul akuzuan talebanët për “vrasjen e dhjetëra civilëve” në shenjë hakmarrje për zonën Spin Boldak të Afganistanit jugor, të cilën ata e kishin kapur më 14 korrik.
“Këto vrasje mund të jenë krime lufte. Duhet t’i nënshtrohen hetimit dhe luftëtarët ose kreu i talebanëve që janë përgjegjës duhet të mbajnë përgjegjësi,” thanë dy ambasadat, duke përdorur terma të ngjashëm, në llogaritë e tyre përkatëse në Twitter, duke iu referuar një raporti të Komisionit të pavarur Afgan për të Drejtat e Njeriut, organizatë qeveritare.
Dy ambasadat theksojnë se “administrata talebane duhet të mbajë përgjegjësi për krimet e luftëtarëve të saj.” Nëse nuk jeni në gjendje të kontrolloni luftëtarët tuaj tani, nuk keni të bëni asgjë me qeverinë më vonë”./Opinion.al
