Pas diskutimeve mbrëmjen e së martës në Komisionin për çështjet Europiane në Parlamentin holandez, ende nuk ka një përgjigje të qartë sa i takon negociatave me Shqipërinë.
Në një reagim të ambasadës Holandeze lidhur me diskutimin e djeshëm theksohet se Maqedonia e Veriut dhe Shqipëria duhet të trajtohen sipas meritave pra të ndara në këtë proces. Për vendin fqinj Parlamenti holandez duket më optimist për çeljen e negociatave ndërsa në rastin e Shqipërisë vihet në dukje se ka ende shumë punë për tu bërë në luftën kundër korrupsionit dhe krimit të organizuar.
Vendimi përfundimtar i parlamentit holandez pritet të merret më 15 tetor në mbledhjen e ministrave të Jashtëm të Bashkimit Europian.
Deri tani në fuqi është mocioni që i ndalon qeverisë çeljen e negociatave me Shqipërinë por kjo mund të ndryshojë deri në datën 15. Ministri i Jashtëm Stef Blok ka bërë të ditur më herët se “çelja e negociatave me Shqipërinë është e parakohshme”, duket se Holanda nuk do të jetë i vetmi vend kundër celjes negociatave çka do të thotë se kërkon të njihet më parë me vendimin e Francës lidhur me këtë cështje
Qëndrimi i Holandës nga Ambasada holandeze
– Vendet kandidate duhet të përmbushin kushtet strikte përpara se të bëjnë një hap tjetër në procesin e integrimit.
– Holanda ndjek në mënyrë kritike progresin në të dyja vendet dhe është e mendimit se Këshilli duhet të vlerësojë secilin vend sipas meritave.
– Në Qershor 2018, Këshilli parashtroi një sërë kriteresh për t’u përmbushur nga Maqedonia e Veriut para hapjes së negociatave. Progresi i bërë është inkurajues. Gjithashtu marrëveshja e Prespës është një shembull për rajonin. Vazhdimësia e rasteve të ndërmarra nga Prokuroria Speciale është siguruar me dorëzimin tek Prokurori i Përgjithshëm. Një hap i rëndësishëm që ende duhet të ndërmerret është miratimi i ligjit që garanton prokurorinë e pavarur në rastet e ardhshme të korrupsionit në nivelet e larta.
– Këshilli ka parashtruar një sërë kriteresh për t’u përmbushur nga Shqipëria përpara hapjes se negociatave. Holanda e mirëpret punën e madhe dhe hapat e ndërmarra në vitin e fundit. Holanda mendon se më shumë punë duhet bërë në luftën kundër korrupsionit dhe krimit të organizuar. /Opinion.al
