Kreu i emergjencave civile, Haki Çako foli sot në një lidhje “Skype” për Milori Live në Klan Neës për situatën aktuale të motit në vend.
Çako u shpreh se situata në dy qarqet më problematike, Shkodër dhe Lezhë është nën kontroll dhe deri më tani dëmet janë minimale. I pyetur për masat që do të merren për 24 orët e ardhshme, Çako tha Agjencia e Mbrojtjes Civile është koordinuar me strukturat përgjegjëse dhe bashkitë.
Mirela Milori: Natyrisht jeni në terren, ku ndodheni aktualisht?
Haki Çako: Jam në Lezhë.
Mirela Milori: Si paraqitet situata në atë qark?
Haki Çako: Situata është përmirësuar duke marrë parasysh intensitetin e lartë sidomos gjatë paradites së sotme, ka pas një prurje të jashtëzakonshme të disa përrenjve dhe lumenjve por edhe prezencë uji në qytet për shkak të rritjes së nivelit të Drinit.
Mirela Milori: Po në Shkodër, si paraqitet situata nga të dhënat që keni?
Haki Çako: Në qarkun e Shkodrës situata është nën kontroll. Ka tre ditë që intensiteti i reshjeve ka qenë i lartë sidomos në zonat malore, është rritur niveli i Drinit por nivelet e lumenjve janë nën kuotat maksimale që përbëjnë rrisk të shtuar për banorët e ekonominë.
Mirela Milori: Sinoptikanët kanë parashikuar një situatë jo të favorshme gjatës natës në këto dy qarqe për reshjet, çfarë masash keni marrë? Si jeni përgatitur për 24 orët e ardhshme?
Haki Çako: Agjencia Kombëtare e Emergjencave është përgjegjëse për koordinimin dhe bashkëpunimin mes strukturave e institucioneve që kanë për detyrë të përballojnë fatkeqësitë natyrore. Ka pasur informacione se kjo javë do kishte prurje dhe reshje të konsiderueshme, besoj që situata është menaxhuar shumë mirë pasi të gjithë komponentët janë bashkërenduar jo vetëm në Lezhë e Shkodër por edhe në bashki të tjera. Kanë montuar dhe u kanë ardhur në ndihmë banorëve që kanë pasur nevojë. Ka prezencë uji në sipërfaqe të arave por jo në banesa.
Mirela Milori: Si janë dëmet e shkaktuara krahasuar me përmbytjet e kaluara?
Haki Çako: Janë të konsiderueshme shpesh herë kur ato kalojnë masën por përtej efektit të fenomenit natyror është një zgjidhje e mirë ekonomike. Në rastin konkret dëmet janë minimale, megjithatë situata shihet pasi uji të tërhiqet nga komisionet e vlerësimit të bashkive.
Rast pas rasti, dëmet e fermerëve apo biznesve dokumentohen dhe vihen në dispozicion bashkive, me buxhetin që ata kanë, ose adresohen në Komitetin e Mbrojtjes Civile në rast se buxheti i tyre nuk mjafton për të mbuluar dëmet./ Tv Klan
