Fundi i shkollës erdhi dhe ndërsa nisin pushimet verore, për shumë nxënës hapet një kapitull i ri. Ata që janë në klasën e nëntë do të shkojnë në gjimnaz duke lënë pas shokët e viteve të shkollës dhe mësuesit më të dashur. Për Klean, Albanin, Kiarën, Adiolin, Pranverën dhe Sergiton që vijnë nga shkolla “Mihal Grameno”, kjo mësuese është Flora.
Ajo ka qenë si një mikeshë për ta dhe trishtimi që do të ndahen edhe prej saj është i madh. Ata e kanë ftuar në “Ka Një Mesazh për Ty” nga “E Diela Shqiptare” në Tv Klan për t’i lënë një kujtim të bukur mësueses së dashur.
Klea: Zysha, ti e di sa shumë ke bërë ti për ne dhe puna jote, shpresoj të të kemi bërë një shpërblim të vogël ndaj punës tënde shumë të madhe që ke bërë ndaj secilit prej nesh në çdo aspekt të një mësuesi, një prindi dhe pastaj një mikeje shumë të mirë, dihet që ky është viti i fundit që kemi bashkë dhe ndarja do të jetë e vështirë, e kemi përjetuar të gjithë dhe që ta bëjmë këtë ndarjen bashkë sa më të veçantë dhe të të lëmë ty një kujtim sa më të bukur, vendosëm të të sjellim këtu në një falënderim për gjithë punën tënde.
Flora: Të falënderoj shumë!
Albani, i cili dikur ishte më mistreci i shkollës, tanimë ka ndryshuar falë mësuese Florës. Ai ndan disa fjalë të veçanta për të.
Alban: Zysha është një nga njerëzit më të rëndësishëm që kam dhe që më përkrah më shumë. Ajo më ka sjellë këtu ku jam sot. Po mos të ishte për atë, as sjelljen s’do e kisha njësoj.
Flora: Unë çdo mëngjes që futem te klasa, kam një fjali që e përdor vazhdimisht, jeni më të mirët! Këtë e përdor për t’u dhënë siguri, vetëbeism, për t’u treguar se kanë shumë mundësi. Janë më të mirët! tvklan.al
