Sekretari amerikan i Mbrojtjes, Lloyd Austin është konfirmuar me Covid-19, pasi varianti shumë infektiv Omicron shkaktoi një rritje të rasteve në të gjithë Shtetet e Bashkuara të Amerikës.
Mediat raportojnë se Austin ka simptoma shumë të lehta dhe se ai do të karantinohet në shtëpi për 5 ditët e ardhshme.
Shefi i Pentagonit ka thënë se është plotësisht i vaksinuar dhe ka marrë edhe dozën përforcuese, gjë që “e kishte bërë infeksionin shumë më të butë”, sipas tij.
“Vaksinat funksionojnë dhe do të vazhdojnë të jenë kërkesë shëndetësore në ushtri. Unë do të vijoj të inkurajoi të gjithë ata që kualifikohen për një dozë përforcuese ta marrin një të tillë”, thuhet në deklaratën e sekretarit të Mbrojtjes.
Austin ka treguar se ka qenë në kontakt të fundit me Presidentin Joe Biden më 21 dhjetor, më shumë se një javë para se atij t’i shfaqeshin simptomat.
Sekretari i Mbrojtjes tha se do të vazhdojë të kryejë detyrat e të marrë pjesë në takime e diskutime virtuale, për aq sa është e mundur.
Pentagoni javën e kaluar forcoi kufizimet për shqetësimin për Omicron dhe ushtria amerikane ka vendosur një mandat për vaksinën anti-Covid.
Austin është zyrtari më i fundit i profilit të lartë në SHBA që ka rezultuar pozitiv me Covid-19./Opinion.al
