Pas situatës së jashtëzakonshme të krijuar nga tërmeti, mijëra shqiptarë janë solidarizuar duke dërguar ndihma monetare dhe materiale për të prekurit nga kjo tragjedi. Megjithatë ditën e djeshme pati raportime se me këto ndihma po abuzohet dhe nuk po adresohen tek personat që kanë nevojë.
Këtë gjë e konfirmoi edhe kryeministri Rama në mbledhjen e sotme të qeverisë. Ai bëri thirrje që tashmë ka nevojë për koordinim të shpërndarjen e ndihmave dhe udhëzoi që ato të adresohen në kanalet e Ministrisë së Mbrojtjes. Rama shtoi gjithashtu se ai do të organizojë një konferencë donatorësh në të gjithë shqiptarinë.
“Njerëzit në Kosovë nuk është më e nevojshme sjellja e veshjeve. Falë jush dhe shumë të tjerëve ka një sasi të jashtëzakonshme. Natyrisht mund të ketë nevojë për shumë më tepër koordinim dhe harmonizim. Ju lutem të gjithëve atyre të adresohen në drejtim të Ministrisë së Mbrojtjes dhe Emergjencave. Po ndodh një situatë ku nuk po përfitojnë ata që kanë nevojë. Ka dhe abuzime. Ne po përgatitemi për një konferencë donatorësh të gjithë zonës shqipfolëse. Në këto kushte është e rëndësishme që të gjithë të bëjnë atë që munden. Të gjithë të bëjnë atë që kanë mundësi. Lutem shumë të na mirëkuptojnë në nevojën për të pasur një adresim. Ne jemi të gatshëm për të dhënë adresën unike. Adresohuni aty për të marrë informacion se ku mund të shkoni. Fluksi ka qenë i jashtëzakonshëm. Nuk është në nevojën tonë të krijojmë një stok materialesh por të adresoheni aty ku është plaga. Ky kontribut është një ndihmë për ne”, tha Rama.
Kryeminstri bëri gjithashtu me dije se në faqen zyrtare për mbledhjen e ndihmave, ‘e-albania’, ka patur shumë kontribute dhe se ato do të menaxhohen në transparencë të plotë.
“Në faqen e ‘e-albania’ pashë të dhënat, ka kontributorë të mëdhenj, por ka dhe kontributorë të vegjël, por që janë tejet të çmuar. Duke pasur në komunitet këto organizata do garantojmë një besueshmëri të madhe në përdorimin e çdo qindarke nga donatorët. Çdo qindarkë do jetë i monitoruar nga shumë sy. Do bëjmë një transparencë të plotë. Në këtë proces është e rëndësishme që në komunitet është edhe sipërmarrja”, tha Rama.
Ndërkohë ministrja e Mbrojtjes, Olta Xhaçka ka njoftuar më herët vënien në dispozicion të tre numrave të telefonit të cilët mund të kontaktohen për ndihmë në lidhje me situatën e krijuar. Numrat janë: 04-22-22-223, 04-22-28-250, 068-80-46-664. /Opinion.al
