Jurgen Gjasula ka zhvilluar një sezon të shkëlqyer me Grojter Fyrtin në Bundesligën 2 dhe për pasojë ka tërhequr vëmendjen e disa klubeve.
Më i interesuari është Nyrenbergu, që po lufton për ngjitje në Bundesligë dhe njëkohësisht po bën që tani planet për sezonin e ardhshëm.
Mediat gjermane kanë raportuar se Gjasula, së bashku me sulmuesin austriak Zulj, janë takuar ditët e fundit në Nyrenberg me trajnerin Rene Vajler, natyrisht për të diskutuar për ndonjë marrëveshje në verë.
Megjithatë, e gjitha kjo është bërë në fshehtësi dhe pa aprovimin e Grojter Fyrtit, që nuk e ka pritur aspak mirë këtë lajm.
Të dy futbollistët janë nën kontratë me Grojter Fyrtin deri në vitin 2017, ndaj Nyrenbergu nuk lejohet t’i kontaktojë dhe fillimisht duhet të flasë me Grojter Fyrtin, që natyrisht do të ishte i gatshëm t’i shiste dy yjet e vet, në varësi të ofertës.
Tani mbetet për t’u parë ç’do do të ndodhë me mesfushorin shqiptar, i cili këtë javë kthehet në fushë, pas 5 ndeshjesh pezullim.
