Që pas humbjes së Partisë Demokratike, Jul Deda ka qenë një prejzërave më kritik të Bashës dhe shpesh ka kërkuar me ngulm dorëheqjen e këtij të fundit. Në një status në FB, Deda ka ironizuar keq Bashën duke u shprehur se ai ka kompleks Berishën, dhe se po tenton të shkatërrojë emrin e këtij të fundit në Parti.
Statusi i plotë:
“Urdhër i komandës së Republikës se Re.
Të denigrohet çdo anetar partie, që nuk mendon si shefi. Të kritikohet pa kompromis çdo elemet politik i para viteve 2013 në PD, kohë në të cilën drejtonte Sali Berisha. Pra, të vazhdojmë shembullin e vëllezërve rilindas, ku për çdo gjë thuhej se “fajin e ka Saliu”.
Ky urdhër hyn në fuqi menjëherë. Po si nuk ju vjen zor? Po si mund të shkelni mbi punën e tjetrit kështu? Fakti, që kryetari i ngrirë e ka kompleks Doktorin, nuk është faji i këtij të fundit.
Shikoni pak ku shkon hileja. Lexoni pak një nga pikat e manualit të deputetit, shikoni se çfarë u kërkohej kandidatëve për deputetë nga zyra e propagandës e Republikës së re, që ta artikulonin në takime me njerëzit:
“Flisni për arritjet e Bashës, rruga Durrës-Kukës, liberalizimi i vizave, Tuneli i Elbasanit, NATO”. Qesharake. Të gjithë e dijnë se këto u bënë me iniciativë personale të Berishës dhe për të qenë korrekt deri në fund, meritat i takojnë atij, që merr dhe përgjegjësitë për deshtimin jo dikujt, që sukseset e të tjerëve ja krediton vetes dhe dështimet e veta ja faturon të tjerëve.
Nëse duam bashkimin dhe ringritjen duhet të flasim me zë të lartë për shkaqet e vërteta të humbjes. Na duhet një lider, që di të mbajë fjalën e dhënë dhe të imponon respekt si në fitore ashtu dhe në humbje. Na duhet një lider, që nuk bën pakte të fshehta me kundërshtarin dhe linçon mendimin ndryshe brenda partisë. Na duhet dikush, që aleancën e bën me popullin opozitar jo me satrapin e pushtetit. Na duhet dikush, që del në fushën e betejës i pastër, pa komplekse, pa frikë, se nuk është as i shitur as i blerë, sepse paktin e ka me popullin jo me pushtetin”.
