Ish-kryetarja e Kuvendit, Jozefina Topalli, është shprehur se lënia jashtë listave të kandidatëve për deputet të PD-së, ishte një vendim i familjes Basha.
Sipas saj, një vendim i tillë; ishte i papritur, pa sens, pa logjikë dhe pa arsye.
“Eshtë një vendim i familjes së Bashës, prandaj s’kam asnjë keqardhje. Më vjen keq që s’jam në Parlament, por s’më vjen keq që s’jam pjesë e grupit të tyre. Një pjesë e atij grupi nuk kanë lidhje me PD, nuk i lidh asgjë me Partinë Demokratike, nuk i kam parë ndonjëherë të japin një kontribut për të djathtët, nuk i njoh”, tha Topalli.
Ajo foli edhe për kohën që ka qenë në qeveri dhe opozitë me Lulzim Bashën dhe se çfarë nuk përlqente te ai.
“Gjatë bashkëjetesës me Bashën nuk më pëlqente te ai papërgjegjshmëria që ai kishte në ushtrimin e funksioneve shumë të rëndësishme që kishte. Kur ishte në Bashki, nuk punoi gjatë katër viteve, nuk la asnjë gjurmë. Kryetar i Bashkisë së Tiranës, është të jesh kryeministër i këtij qyteti. Të jesh katër vite dhe të mos lesh asgjë, nuk e imagjinoj. Është detyrë, është premtim është sfidë”, – u shpreh ish-kryeparlamentarja.
Topalli tha se nuk ka besuar asnjëherë që Lulzim Basha do t’a çonte PD-në në nivelin tjetër, pasi e la Berisha. Ajo tregoi se të flirtosh me Ramën dhe të jesh në opozitë nuk shkojnë të dyja bashkë.
“Të flirtosh nuk do të thotë të jesh në qeveri, edhe pse ai në qeveri ka qenë 3 muaj rresht, me ata të ashtuquajtur ministra teknikë”, tha Topalli e ftuar në “Oktapod”.
Më tej, Topalli theksoi se Basha ka marrë peng siglen e Partisë Demokratike.
“Po të donte z.Berisha mund t’a hiqte Lulin nga kreu i kësaj partie, kjo do të ndodhte brenda 24 orëve. Ai nuk e bën këtë, sepse Berisha kur dha dorëheqjen tha që betejat e mia kanë mbaruar”, tregoi ajo.
Ish-kryeparlamentarja ka folur edhe për mënyrën e drejtimit të kësaj partie, duke marrë një paralelizëm me Berishën.
“Nuk ishte e thjeshtë që pas ikjes se Berishës, dikush të zinte karrigen. Problemi është se të jesh kryetar i PD-së, së pari duhet të kesh autoritet moral, duhet të jesh i vërtetë, duhet të jesh frymëzues, duhet të bësh beteja të forta, nuk mendoj se ndonjërën prej tyre e ka Basha. Nga 2005 deri në 2017, janë 12 vite në politike, ka pasur të gjitha shanset për të na bindur se ai mund të ishte një kryetar, por nuk e bëri. Ne shkodranët kemi një shprehje “nuk është me të bleme, asht me të leme”.
Nëse ka një fjale që e përshkruan Lulzim Bashën është se: ai është i rremë në fushatë, i rremë kur flet”, – deklaroi ajo.
Topalli foli edhe për marrëveshjen e 18 majit, dhe për zgjedhjet e fituara nga socialistët, duke u ndalur në togfjalëshin: “Rama ia hodhi Bashës”
Turi: Pas Berishës del që Rama del më i zgjuari si lider?
Jozefina: Varet se kë ke përballë pastaj!
Ish-deputetja e PD-së, shprehu rezerva edhe për mënyrën e komunikimit që Basha kishte në çadrën e lirisë. “Basha në 5 javë në cadër, ka sulmuar me shumë perëndimin se Ramiz Alia në 5 vite”, – përfundon ajo.
