Këshilltari për siguri kombëtare i Shtëpisë së Bardhë, John Bolton ka pritur në takim ministrin e Jashtëm të Serbisë, Ivica Daçiq. Përmes një postimi në Twitter, Bolton ka thënë se është koha që të dyja palët të veprojnë menjëherë dhe se dialogu ndërmjet Kosovës dhe Serbisë duhet të lëvizë përpara.
“Ishte kënaqësi të pres ministrin Daçiq. Ramë dakord se dialogu me Kosovën duhet të vazhdojë përpara, pasi asnjëra palë nuk fiton nga status-quoja. Koha për të vepruar të dyja palët është tani”, ka shkruar Bolton.
Ndërkohë, në një intervistë për Zërin e Amerikës në gjuhën serbe, ministri i Jashtëm, Daçiq ka thënë se administrata amerikane e kupton se problemi nuk është në Beograd, por qëndron në Kosovë, tek autoritetet e Prishtinës.
Duke folur për takimet me zyrtarët e lartë amerikanë, Daçiç tha se gjetja e një zgjidhjeje të qëndrueshme dhe paqësore për problemin e Kosovës është në listën e prioriteteve të politikës së jashtme të administratës së presidentit amerikan Donald Trump.
Dialogu ndërmjet Kosovës dhe Serbisë është ndërprerë që nga nëntori i vitit të kaluar, pasi qeveria kosovare vendosi tarifa ndaj mallrave serbe. Autoritetet serbe kërkojnë heqjen e tarifës, në mënyrë që të kthehen në tryezën e bisedimeve, por qeveria e Kosovës thotë se pa një kornizë marrëveshje që parasheh njohjen nga ana e Serbisë, nuk do ta shfuqizojnë tarifën./Opinion.al
