Burimet natyrore të naftës e gazit në Shqipëri, por dhe ndërtimi i sistemit shpërndarës kryesisht me tubacionin transadriatik TAP e kanë rritur koeficientin e vleresimit të tregut energjitik shqiptar. Përveç përcjelljes së gazit të lëngshëm nga burimet e Lindjes në Europë, Shqipëria synon të luajë aktorin e rëndësishëm në rajon me ndërtimin e dy tubacioneve shoqëruese në rajon, duke u lidhur me rrjetin europian të energjisë.
Gazsjellësi Shqipëri-Kosovë, ALKOGAP, është tashme në fazën e studimit paraprak të fizibilitetit që pritet të përfundojë në vitin 2018 për t’i hapur rrugë projektit, që do të gazifikojë Kosovën si një nga vendet e vetme që nuk janë të lidhura me rrjetet evropiane të gazit. Rëndësia strategjike e këtij gazsjellësi me një gjatësi prej 260 km me kapacitet për të transmetuar rreth 2 miliardë metra kub gaz natyror, nga e cila 1 deri në 1.3 miliardë në Shqipëri dhe 0.5 deri 0.7 miliardë metra në Kosovë, konsiderohet e madhe, raporton RTSH.
Tubacioni i Adriatikut Jon, IAP, i cili do të ofrojë gaz edhe për Malin e Zi, Bosnjë dhe Kroaci, është gjithashtu në fazën e studimit që pritet të përfundojë brenda vitit 2019 dhe pastaj të fillojë pjesa fizike e projektit. Projekti është 540 km i gjatë, duke filluar nga Fieri në Shqipëri dhe duke përfunduar në Split në Kroaci. Investimi i përgjithshëm për projektin është 618 milionë euro, kryesisht nga BE për një kapacitet për të transmetuar rreth 5 miliardë metra kub gaz natyror, 1 miliardë për Shqipërinë, 0.5 për Malin e Zi, 1 për Bosnjë dhe 2.5 miliardë për Kroacinë.
