Jo vetëm në kërkim, hetim pasurie për ish-drejtuesit e lartë të Policisë

Tre drejtues të lartë të Policisë janë në kërkim prej mëse një muaji, pas mandatarresteve të lëshuara nga Prokuroria e Krimeve të Rënda. Por duket se pozita e tyre do të rëndohet më shumë pasi krahas hetimit penal 3 ish-drejtuesit e policisë së Vlorës të cilët dyshohet se kanë ndihmuar grupin e Habilajve në kultivimin dhe trafikun e kanabisit, do të përballen edhe me një hetim pasuror. Ky është informacioni më i fundit që vjen nga Prokuroria e Krimeve të Rënda e cila do të kërkojë që për Jaerd Çelën, Gjergj Kohilën dhe Sokol Boden, të bëhet kontroll i të gjitha pasurive. Aktualisht askush nuk mund të thotë se ku ndodhen tre ish-drejtuesit e lartë të Policisë Vlorë ndërkohë që mbi ta rëndon akuza e përfshirjes në kuadër të grupit të strukturuar kriminal, ku sipas prokurorisë ata kanë bashkëpunuar me grupin e “Habilajve”.