Jo vetëm Evropa, por edhe rajoni po preket nga kriza e ilaçeve. Kjo bëhet e ditur nga një artikull i gazetës “Politico” e cila i referohet një anketë të realizuar në 29 vende evropiane duke përfshirë shtete si Kosova, Maqedonia e Veriut ,Turqia dhe Norvegjia.
Pothuajse një e katërta e farmacive në këto vende kishin mungesë të më shumë se 600 ilaçeve.
Në Belgjikë, autoritetet regjistrojnë pothuajse 300 barna në mungesë, në Gjermani, numri është 408 , ndërsa në Austri ka shkuar në 600. Në Itali situata është dramatike pasi më shumë se tre mijë ilaçe nuk gjenden aktualisht në farmaci. Në tre të katërtat e këtyre vendeve mungesat e ilaçeve ishin më të rënda këtë dimër se një vit më parë.
Por cilat janë disa nga ilaçet në mungesë? Antibiotikët, kryesisht amoksicilina, e cila përdoret për trajtimin e infeksioneve të rrugëve të frymëmarrjes është në mungesë. Shurupi për kollën, paracetamoli dhe ilaçet për presionin e gjakut, janë gjithashtu të pakta.
Kjo situatë u shkaktua nga infeksionet sezonale që filluan herët dhe ishin më të forta se zakonisht duke I gjetur prodhuesit e ilaçeve të papërgatitur. Jo vetëm kaq por edhe inflacioni dhe kriza energjitike kanë rënduar më tej kompanitë farmaceutike.
Përballë kësaj situate disa vende evropiane po vonojnë eksportet për të mbrojtur furnizimet e brendshme./ Klan News
