Gjatë konferencës së përbashkët për mediat me ministrin e Jashtëm austriak Alexander Shallenberg, Ministri i Jashtëm në detyrë, Genc Cakaj u pyet edhe në lidhje me qëndimin e Holandës në lidhje me çeljen e negociatave.
I pyetur nëse i trembej një vote kundër të Holandës, Cakaj tha se nuk ka frikë nga kjo gjë.
“Para se të druhem për votat kundër të secilit vend anëtar, mund të konfirmoj se jemi në një përpjekje intensive për të siguruar vota pro. Ndaj unë nuk kam frikë nga votat kundër, por jam i angazhuar maksimalisht për votat pro”, tha Cakaj.
Ditën e sotme do të zhvillohet seanca plenare në Parlamentin e Holandës ku do të diskutohet çështja e Shqipërisë. Qeveria do ti drejtohet parlamentit në këtë seancë me një letër ku mirëpret hapat e ndërmarra nga Shqipëria gjatë vitit të fundit, por thekson se ka ende shumë punë për të bërë sa i takon luftës kundër korrupsionit dhe krimit të organizuar.
Holanda është një nga dy vendet më skeptike lidhur me çeljen e negociatave me Shqipërinë. Ndryshe nga Franca ata e kanë bërë publik qëndrimin e tyre me anë të deklaratave të ministrit të Jashtët Stef Blok dhe kryeministrit Rutte. /Opinion.al
