Policia Kufitare ka shpëtuar nga mbytje një familje në gjirin e Durrësit. Sipas policisë, familja me 4 anëtarë, mes tyre dhe dy fëmijë të mitur, iu rrezikohej jeta në det, pasi Jet Ski me të cilin po lundronin për qëllime argëtimi, kishte pësuar defekt.
Menjëherë pas marrjes së këtij njoftimi, shërbimet e Policisë Kufitare të DVKM Durrës janë nisur me mjet lundrues, drejt vendit të sinjalizuar.
Si rezultat i operacionit të shpëtimit, 4 familjarët u nxorrën në breg, në gjendje të mirë shëndetësore. Gjithashtu, mjeti lundrues që kishte pësuar defektin, u nxorr në breg duke u tërhequr nga mjeti lundrues i Policisë Kufitare.
Policia Kufitare fton qytetarët, turistët dhe pushuesit që të telefonojnë në numrin pa pagesë 112, për çdo rast nevoje për ndihmë.
