Sekretari i Jashtëm britanik, Jeremy Hunt, i cili është edhe kandidat për ta zëvendësuar Theresa May në postin e kryeministrit, tha sot se Kancelarja gjermane, Angela Merkel i kishte lënë të kuptohet se Bashkimi Evropian është i gatshëm të rinegociojë marrëveshjen e Brexitit dhe atë të kufirit me Irlandën që kundërshtohet fortë nga euroskeptikët.
Hunt tha se ka biseduar me Merkelin gjatë përkujtimit të D-Day dhe tha se ndryshimi i marrëveshjes së arritur nga May për daljen e Britanisë nga BE-ja, është i mundshëm. Sipas tij Merkel i kishte thënë se BE “mund të rinegociojë marrëveshjen” nëse kryeministri i ri britanik “tregon qasjen e duhur”.
“Merkel tha se natyrisht se me një kryeministër të ri të Brtianisë, ne do ta shikojmë edhe njëherë çështjen dhe zgjidhjet që kryeministri do të ofrojë. Jam shumë i bindur se nëse kemi qasjen e duhur për këtë çështje, evropianët do të kenë vullnet që ta rinegociojmë marrëveshjen”, tha Hunt.
Pretendimi i tij vjen përballë pohimeve të përsëritura nga Brukseli se marrëveshja e Brexit nuk mund të rihapet për të ndryshuar kushtet e marrëveshjes për kufirin irlandez, gjë që e refuzojnë euroskeptikët sepse kanë frikë se mund ta mbajnë Britaninë e Madhe në një bashkësi doganore për një kohë të pacaktuar. /Opinion.al
