Sot është zhvilluar seanca për 42 të arrestuarit nga protesta e opozitës e zhvilluar më 2 qershor.
Gjykata Penale vendosi masën arrest me burg vetëm për 2 nga të arrestuarit dhe 3 të tjerë i la me arrest shtëpie. Pjesa tjetër e të arrestuarve kanë marrë masën detyrim paraqitje.
Të arrestuarit akuzohen për “Organizim dhe pjesëmarrje në tubim të paligjshëm, Kundërshtim të punonjësit të policisë”, “Goditje për shkak të detyrës”, “Prishja e qetësisë publike”, “Shkelje e rregullave mbi lëndët plasëse”.
Si pasojë e përdorimit të lëndëve piro-teknike si kapsollat, në protestën e 2 qershorit mbetën të plagosur 10 policë.
Opozita i konsideroi arrestimet dhe vendimet e gjykatës si të frymëzuara politikisht.
Më herët në seancën e zhvilluar me dyer të mbyllura që zgjati për afro 5 orë e 30 minuta në Gjykatën Penale, organi i akuzës kërkoi arrest me burg për 25 protestues dhe detyrim paraqitje për 17 të tjerë. /Opinion.al
