“Ju ndaluat një luftë civile”. Me këto fjalë iu drejtua presidenti i Rusisë, Vladimir Putin, personelit ushtarak të mbledhur në Kremlin, duke iu referuar rebelimit të mercenarëve Wagner të shtunën.
Ai shtoi se as populli rus dhe as forcat e armatosura nuk ishin me grupin e luftëtarëve të udhëhequr nga Yevgeny Prigozhin.
“Ushtarët dhe oficerët janë mbrojtësit e vërtetë të atdheut, të cilët edhe në një kohë të vështirë për vendin, bashkë me bashkëluftëtarët e tyre, penguan trazirat, të cilat në mënyrë të pashmangshme do të rezultonin në kaos. Ju mbrojtët kushtetutën, jetët, sigurinë dhe lirinë e popullit tonë. Ju shpëtuat atdheun tonë nga trazirat”, tha Vladimir Putin, president i Rusisë.
Putin konfirmoi se nëse rebelimi i Wagner nuk do të ishte ndërprerë, Rusia do të humbiste të gjitha fitoret e saj në Ukrainë. “Nuk dihet se çfarë mund të kishte mbetur nga ky vend”, është shprehu presidenti rus. Ai shtoi më tej se lidhur me rebelimin e mercenarëve të Prigozhin nuk ka qenë e nevojshme për Moskën që të thërrasë për shërbim ushtarët e angazhuar në Ukrainë.
Putin shtoi më tej se Wagneri është mbështetur plotësisht nga shteti rus dhe se Prigozhin ka përfituar një pasuri të madhe falë kësaj.
Shefi i Kremlinit ka bërë ndryshime rrënjësore në sistemin e brendshëm të sigurisë, duke lejuar që garda kombëtare e Rusisë, që mbron institucionet, të pajiset me armë të rënda, autoblinda dhe tanke.
Sakaq, konfirmohet dhe lajmi që inteligjenca e drejtësia ruse kanë hequr dorë nga ndjekja penale për rebelim të armatosur ndaj grupit mercenar Wagner. Siç raportohet, aktualisht po kryhet transferimi i pajisjeve dhe armatimeve ushtarake të këtij batalioni luftarak për tek trupat e rregullta të ushtrisë së Putinit.
Kreu i Gardës Kombëtare të Rusisë hodhi dyshimet se revolta është frymëzuar nga inteligjenca perëndimor, një pistë për të cilën kërkoi hetim edhe ministri i jashtëm, Sergei Lavrov. Ndërkohë, avioni i Prigozhin ka mbërritur në Minsk të Bjellorusisë, atje ku duket se do të jetë dhe shtëpia ere e udhëheqësit të mercenarëve Wagner. Më herët, Putin zhvilloi dhe një mbledhje me ministrin e mbrojtjes, Sergei Shoigu dhe me të gjithë shefat e sigurisë e të inteligjencës.
