Një mësuese në Elbasan është pushuar nga puna vetëm se nuk i ka pëlqyer kolektivit. Dy ditë pasi ka shkelur në shkollën 9-vjeçare “Hysen Polaku” në Papër Sallak mësuesja Nertila Kaso është pushuar nga puna. Ajo është e diplomuar për mësuese e ciklit të ulët dhe ka fituar vendin e punës përmes portalit “Mësues për Shqipërinë”. Mësuesja rrëfeu historinë e saj të paprecedent në emisionin “Stop”.
Nertila Kasa u shpreh se “Jam e diplomuar në Master Shkencor për mësuesi arsim fillor, pastaj kam marrë licencën, kam bërë një vit stazh në Papër Sallak këtu në këtë shkollë ku unë jam sot dhe kam marrë nga Drejtoria Arsimore vlerësim 3.7 shumë mirë. Pasi i kam mbaruar gjithë këto, kam fituar të drejtën time në DAR të kërkoj punë. Dhe në datë 5 Dhjetor më thirri drejtoresha e shkollës dhe bashkë me Alqi Çabirin më kanë drejtuar si mësuese ndihmëse në shkollë Papër Sollak edhe Panjun, në të dyja shkollat. Tre ditë mësim në shkollën e Papër Sallakut, drejtoresha më ka thirrur një ditë dhe më ka thënë ti nuk do të vazhdosh më punë sepse kolektivi ty nuk të ka votuar. Pastaj shkoj te Alqi Çabiri, ai më tha që drejtoresha bashkë me kolektivin ty nuk të kanë pranuar si mësuese ndihmëse”.
Gazetarja e “Stop” komunikoi me drejtoreshën, Dituri Gurra, e cila thotë se ka marrë urdhër nga DAR Elbasan për të mbledhur kolektivin nëse e duan apo jo mësuesen Nertila Kasa. Por, një urdhër i tillë me shkrim nuk ekziston.
“Është me urdhër të DAR. Nuk e kam urdhrin, por po ju them me urdhër të DAR. Nuk emëroj unë. Për sqarime të mëtejshme drejtohuni te DAR”, tha drejtoresha.
Mëesuesja Nertila Kasa u largua nga puna dhe ende sot në këtë shkollë nuk është plotësuar vendi vakant. Për rrjedhojë, nxënësit nuk bëjnë orën e mësimit pasi nuk ka mësues.
Në foto: Nertila Kasa
