Japin dorëheqjen dhe drejtorët e Bashkisë së Durrësit, pas kërkesës së kryeministrit Edi Rama dy ditë më parë, në takimin që pati me ta.
Burime për Klan News kanë konfirmuar se drejtuesit e institucioneve në varësi të bashkisë kanë nisur procesin e dorëheqjeve dhe se pas dorëzimit të këtyre dorëheqjeve, vlerësimi i tyre do të bëhet nga një komision i veçantë, i cili deri në fund të korrikut do të vendosë nëse do të vazhdojnë apo jo në pozicionet që mbajnë.
Në disa struktura ku rezultatet kanë qenë pozitive, nuk është kërkuar largimi i drejtuesve. Ndryshe nga Vlora, ku u bënë zëvendësime të shumta, në Durrës pritet vetëm një rifreskim i kufizuar.
Ky hap shihet si përpjekje për të sjellë energji të reja në Partinë Socialiste para zgjedhjeve dhe për të nxjerrë në pah emra të rinj. Ende nuk dihet saktësisht cilët do të jenë drejtuesit që do të largohen nga detyra.
Kryeministri javën e fundit ka zhvilluar disa takime me drejtuesit e bashkive në Vlorë, Fier dhe Durrës, ku ka shprehur kritikat e tij për keqmenaxhim të këtyre qyteteve dhe ka kërkuar largimin e drejtuesve aktualë nga detyra.
Takimi në Durrës u mbajt më 8 korrik, ku Rama u takua me kryebashkiaken, Emiriana Sako, dhe me zyrtarët e tjerë të kësaj bashkie. Po ashtu edhe në bashkinë e Fierit, ai ishte të martën./tvklan.al
