Përfaqësuesja e Belgjikës ka publikuar listën me lojtarët, që do të fillojnë fushatën eliminatore për “Rusia 2018”. Në këtë listë nuk gjendet Adnan Januzaj, i cili është me prejardhje nga Kosova. Trajneri i ri i belgëve, Roberto Martinez, duket se nuk e llogarit Januzajn, i cili mund të luajë për Kosovën, duke rifituar një mundësi garimi ndërkombëtare, të cilën e refuzoi më herët me kuqezinjtë e De Biazit. Menaxheri i kombëtares kosovare, sidoqoftë, thotë se familja dhe vetë lojtari në fjalë janë të paarritshëm, të pakontaktueshëm, sikurse ndodhi në rastin e tentativave nga Shqipëria.
“Januzaj nuk ka luajtur asnjë ndeshje për Belgjikën, që nga pranimi i Kosovës me të drejta të plota në FIFA dhe UEFA, duke përfshirë këtu edhe Kampionatin Europian. Jemi duke provuar gjatë gjithë kohës ta kontaktojmë, por është e pamundur,” – deklaroi Bajram Shala për “Zëri”. Kujtojmë se Adnan Januzaj nuk ishte ftuar te Belgjika as në “EURO 2016”, nga ish-trajneri Marc Wilmots. Ndërkohë, dje Kosova ka marrë edhe një tjetër refuzim në bllok të yjeve të Zvicrës. Kombëtarja helvete ka publikuar listën me lojtarët me prejardhje kosovare, si Valon Behrami, Granit Xhaka dhe Shani Tarashaj, për ndeshjen e radhës me portugezët.
Mungon Xherdan Shaqiri, por kjo e ka një shkak: lëndimin e mesfushorit të Stoke City, jo se ka dilema për t’iu bashkuar të kaltërve. Lidhur me refuzimin e “kosovarëve helvetikë”, Bajram Shala tregon: “Kemi pasur kontakte me familjarët dhe agjentët e tyre, por edhe direkt me vetë lojtarët. Arsyet janë të ndryshme, pse ata nuk vijnë të bëhen pjesë e Kosovës. Me ndeshjen e parë të kësaj fushate eliminatore, që do të luajnë me Zvicrën, këta lojtarë nuk do të mund të luajnë më për Kosovën.”
Përveç yjeve të Zvicrës, Kosovës i dha një goditje edhe FIFA, duke i kthyer përgjigje negative për Mërgim Brahimin. “FIFA e ka kthyer përgjigjen definitive dhe Mërgimi nuk do të ketë të drejtë të luajë për Kosovën, çka është një lajm shumë i keq. Ka qenë një vendim i pritshëm, për shkak se ai ka luajtur për Zvicrën dhe Shqipërinë, më herët”, – u shpreh Shala. Pra, deri më tani, Kosova ka arritur t’i marrë Shqipërisë Mehën, Rrahmanin, Rashicën dhe Shalën, si dhe nga një lojtar kombëtares suedeze dhe asaj norvegjeze.
